【🅿️牌汽車百科👀 | 新手4大泊車練習地點】

講完練車路線後，相信泊車係另一個新手們非常緊張嘅學科。要人車合一做個泊得之人，同樣別無他法，一定要不斷練習，才可找到箇中真諦。所以我哋亦特別為各位新手推介一些練習S位同L位嘅好地方，俾大家安心泊車。

貼士錦囊，駕駛一啲高身擁有較佳視野嘅SUV，或配備360 鏡頭嘅車款都可以協助到各位新手泊得安心。

練習S位

1) 九龍塘高槐路及海棠路停車錶位

地址：九龍塘高槐路8號 / 九龍塘海棠路30號

[難度🅿️] 位於九龍塘一列停車位絕對係練泊位嘅好地方，停車位多達70個，係少數有大量S位練習好地方。而且位置比較少人少車，泊得慢亦唔怕阻礙後車，壓力都少啲。

2) 鯉景灣太康街停車錶位

地址：鯉景灣太康街49號

[難度🅿️🅿️] 鯉景灣太康街海旁嘅停車錶，係香港島練泊S位嘅好地方。停車錶旁邊有兩條行車線， 新手練泊位可以有足夠位置扭軚同預位，亦不會因太慢而阻礙後車。

練習L位

1) 汀九停車場

地址：汀九汀逸路

[難度🅿️] 汀九橋下汀九停車場係練泊L位嘅合適地方。唔少教車師傅都會帶學生係呢度學車，練完泊位，亦可以沿著青山公路汀九段練習使用迴旋處。

2) 大埔公路-琵琶山段停車錶位

地址：金山大埔道389號

[難度🅿️] 位於大埔公路嘅琵琶山段停車場絕對是心水之一，因為呢度非常容易到達，而且停車場係同車路分開，絕對唔會對其他路道使用者做成阻礙。P牌可專心練泊位，絕不擔心會騷擾到其他人，唯一擔心可能係大聖爺會將你嘅練習難度提升，例如礙路或爬上車頭騷擾你。