相信大家都知道港車北上最吸引嘅地方，就係内地買嘢價錢都非常吸引😍雖然內地油價比較低，但入油時都要份外留心！同香港嘅油站唔同，香港只會提供98汽油；而内地有唔同規模嘅油公司，佢地通常都會提供三種嘅無鉛汽油，分別係92號、95號、98號，而佢地之間嘅分別就在於辛烷值唔同，一分錢一分貨，辛烷值低嘅汽油價錢就更加平，但汽油嘅質素就有一定分別！😱

辛烷值係決定汽車「抗爆震性」嘅重要指標，所以如果汽油嘅辛烷值數值越大，代表呢隻汽油嘅抗爆震性程度越高，換言之三種汽油嘅抗爆震性為98無鉛汽油最好、95無鉛汽油次之、92無鉛汽油最低。

爆震嘅產生代表引擎發生緊唔正常嘅燃燒而造成唔尋常嘅震動，經常發生喺上坡踩油嘅時候，最明顯就係會聽到高頻率嘅金屬敲擊聲，稱爲敲缸。如果車主喺揸車途中出現爆震嘅狀況就必須揾整車師傅檢查，確認係咪車輛發生異常狀況，否則好易造成車輛受損，例如：燒壞活塞、燒壞氣門，到時候愛驅損傷咗就得不償失啦！💔 如果檢查完而並非車輛機械嘅問題，就可以嘗試更換較高辛烷值嘅汽油，或許可以改善爆震嘅狀況。如果車主們都優先選擇98汽油，或者可以避免以上問題發生！

辛烷值越高嘅汽油，代表住擁有相對高嘅抗爆震性能力，咁但係入辛烷值最高嘅汽油，對於車輛就一定最好呢？答案係 NO! 我哋最好睇返車輛原廠【車主手冊】嘅建議，選擇返建議嘅汽油會較爲適合！

雖然内地嘅油價非常吸引，但我哋喺香港普遍使用質素有保證嘅98汽油，可以保證到汽車嘅正常運作同保護。因此，大家北上入油都要留意油嘅質素，最好都選擇返有信心保證嘅大型連鎖油公司入油！

以上就係今堂嘅教學内容，大家都仲想知道邊啲港車北上資訊，快啲留言同我哋講啦！