車漆就等於人嘅皮膚，唔妥善保養就會變得粗糙暗啞。汽車日常駕駛及戶外泊車都會

加速車漆老化，包括紫外線、酸雨、灰塵、污泥等，所以愛車之人都不外乎選擇打蠟、鍍膜或 PPF 三大汽車美容服務為愛驅保養。不過大家又知唔知道佢哋嘅分別同特點呢？立即同大家逐一講解啦!

打蠟

最傳統嘅汽車美容服務，透過唔同種類嘅車蠟用海棉塗上車身，再以拋光機係車身上轉動，令車身漆面變得光潔如新。

打蠟有咩功效

打蠟係傳統嘅汽車美容方法，為車身改善亮度同撥水性，達到跣水、反光、耐熱、抗氧化等功效。車蠟含有矽乳，可以將車漆上細微嘅刮痕暫時填平，部分車蠟更含有研磨成分，能磨走車身表面嘅頑固污漬。

車蠟有咩種類

車蠟種類繁多，常見嘅有乳蠟、細蠟、粗蠟、釉蠟、棕櫚蠟等。

打蠟持久度

打蠟嘅缺點就係防護持久度較短，一般只可以維持約幾個月至半年不等。

鍍膜

鍍膜可以講係打蠟嘅加強版，需要先徹底清潔及打磨拋光車身，才可進行鍍膜。

鍍膜有咩功效

鍍膜原液主要由唔會氧化嘅納米覆膜分子組成，因分子體積比車蠟更細小，所以乾透之後硬化而成嘅透明薄膜，可以緊密地覆蓋車身表面保護車漆，降低酸雨、雀屎、紫外線及污染物等對車身嘅傷害，並具高潑水性、耐高溫、抗強酸鹼腐蝕等優點。

鍍膜有咩種類

鍍膜可分為鍍晶同水鍍膜，結晶型鍍膜又可再分為樹脂類鍍膜、氟素類鍍膜、石英鍍膜及類玻璃纖維素鍍膜四種。

鍍膜持久度

鍍膜一般可維持約 1 至 3 年，視乎車主恆常清潔保養而定。

PPF

車漆保護膜又稱為自我修復膜，一層覆蓋係車漆表面嘅透明保護膜，有超強韌性同自我修復能力，保護性極強。

PPF 有咩功效

PPF能夠抵抗沙石、酸雨、雀糞及酸雨等侵害，保護性極強。當貼膜被沙石等銳物刮傷後，可透過高溫修復回原來嘅結構同外貌，所以又被稱為自我修復膜。

PPF有咩種類

PVC 同 TPU。PVC 屬中低端嘅 PPF，冇修復功能，可對保護膜進行輕度拋光同處理小刮痕。TPU 屬於高級版嘅 PPF，分為頂塗層同無頂塗層，帶塗層具有劃痕修復能力，而且防污抗腐蝕能力較強，耐用度亦較長。

PPF 持久度

PPF 嘅耐用度一般可超過 5 年，並配有防變色外層，持久度係三者中最高。